Bhagvad Gita 01-1

 

धृतराष्ट्र उवाच |

धर्मक्षेत्रे कुरुक्षेत्रे समवेता युयुत्सवः |

मामकाः पाण्डवाश्चैव किमकुर्वत सञ्जय ||1||

Bhagvad Gita 01-2

 सञ्जय उवाच ।

दृष्ट्वा तु पाण्डवानीकं व्यूढं दुर्योधनस्तदा ।

आचार्यमुपसङ्गम्य राजा वचनमब्रवीत् ।। 2।।

Bhagvad Gita 01-3

 पश्यैतां पाण्डुपुत्राणामाचार्य महतीं चमूम् ।

व्यूढां द्रुपदपुत्रेण तव शिष्येण धीमता ।। 3।।

Bhagvad Gita 01-4

 अत्र शूरा महेष्वासा भीमार्जुनसमा युधि

युयुधानो विराटश्च द्रुपदश्च महारथ: || 4||

Bhagvad Gita 01-5

 धृष्टकेतुश्चेकितान: काशिराजश्च वीर्यवान् |

पुरुजित्कुन्तिभोजश्च शैब्यश्च नरपुङ्गव: || 5||

Bhagvad Gita 01-6

 युधामन्युश्च विक्रान्त उत्तमौजाश्च वीर्यवान् |

सौभद्रो द्रौपदेयाश्च सर्व एव महारथा: || 6||

Bhagvad Gita 01-7

 अस्माकं तु विशिष्टा ये तान्निबोध द्विजोत्तम |

नायका मम सैन्यस्य संज्ञार्थं तान्ब्रवीमि ते || 7||

Bhagvad Gita 01-8

 भवान्भीष्मश्च कर्णश्च कृपश्च समितिञ्जय: |

अश्वत्थामा विकर्णश्च सौमदत्तिस्तथैव च || 8||

Bhagvad Gita 01-9

 

अन्ये च बहव: शूरा मदर्थे त्यक्तजीविता: |

नानाशस्त्रप्रहरणा: सर्वे युद्धविशारदा: || 9||

Bhagvad Gita 01-10

 अपर्याप्तं तदस्माकं बलं भीष्माभिरक्षितम् |

पर्याप्तं त्विदमेतेषां बलं भीमाभिरक्षितम् || 10||

Bhagvad Gita 01-11

 अयनेषु च सर्वेषु यथाभागमवस्थिता: |

भीष्ममेवाभिरक्षन्तु भवन्त: सर्व एव हि || 11||

Bhagvad Gita 01-12

 

तस्य सञ्जनयन्हर्षं कुरुवृद्ध: पितामह: |

सिंहनादं विनद्योच्चै: शङ्खं दध्मौ प्रतापवान् || 12||

Bhagvad Gita 01-13

 तत: शङ्खाश्च भेर्यश्च पणवानकगोमुखा: |

सहसैवाभ्यहन्यन्त स शब्दस्तुमुलोऽभवत् || 13||

Bhagvad Gita 01-14

 

तत: श्वेतैर्हयैर्युक्ते महति स्यन्दने स्थितौ |

माधव: पाण्डवश्चैव दिव्यौ शङ्खौ प्रदध्मतु: || 14||

Bhagvad Gita 01-15

 

पाञ्चजन्यं हृषीकेशो देवदत्तं धनञ्जय: |

पौण्ड्रं दध्मौ महाशङ्खं भीमकर्मा वृकोदर: || 15||

Bhagvad Gita 01-16-17-18

 

अनन्तविजयं राजा कुन्तीपुत्रो युधिष्ठिर: |

नकुल: सहदेवश्च सुघोषमणिपुष्पकौ || 16||

 

काश्यश्च परमेष्वास: शिखण्डी च महारथ: |

धृष्टद्युम्नो विराटश्च सात्यकिश्चापराजित: || 17||

 

द्रुपदो द्रौपदेयाश्च सर्वश: पृथिवीपते |

सौभद्रश्च महाबाहु: शङ्खान्दध्मु: पृथक् पृथक् || 18||

Bhagvad Gita 01-19

 

स घोषो धार्तराष्ट्राणां हृदयानि व्यदारयत् |

नभश्च पृथिवीं चैव तुमुलोऽभ्यनुनादयन् || 19||

Bhagvad Gita 01-20

 

अथ व्यवस्थितान्दृष्ट्वा धार्तराष्ट्रान् कपिध्वज: |

प्रवृत्ते शस्त्रसम्पाते धनुरुद्यम्य पाण्डव: |

हृषीकेशं तदा वाक्यमिदमाह महीपते |||20||

Bhagvad Gita 01-21-22

 अर्जुन उवाच |

सेनयोरुभयोर्मध्ये रथं स्थापय मेऽच्युत |

यावदेतान्निरीक्षेऽहं योद्धुकामानवस्थितान् || 21||

कैर्मया सह योद्धव्यमस्मिन् रणसमुद्यमे || 22||

Bhagvad Gita 01-23

 योत्स्यमानानवेक्षेऽहं य एतेऽत्र समागता: |

धार्तराष्ट्रस्य दुर्बुद्धेर्युद्धे प्रियचिकीर्षव: || 23||

Bhagvad Gita 01-24

 सञ्जय उवाच |

एवमुक्तो हृषीकेशो गुडाकेशेन भारत |

सेनयोरुभयोर्मध्ये स्थापयित्वा रथोत्तमम् || 24||

Bhagvad Gita 01-25

 भीष्मद्रोणप्रमुखत: सर्वेषां च महीक्षिताम् |

उवाच पार्थ पश्यैतान्समवेतान्कुरूनिति || 25||

Bhagvad Gita 01-26

 तत्रापश्यत्स्थितान् पार्थ: पितृ नथ पितामहान् |

आचार्यान्मातुलान्भ्रातृ न्पुत्रान्पौत्रान्सखींस्तथा |

श्वशुरान्सुहृदश्चैव सेनयोरुभयोरपि || 26||

Bhagvad Gita 01-27

तान्समीक्ष्य स कौन्तेय: सर्वान्बन्धूनवस्थितान् |

कृपया परयाविष्टो विषीदन्निदमब्रवीत् || 27||

 

Bhagvad Gita 01-28

 अर्जुन उवाच |

दृष्ट्वेमं स्वजनं कृष्ण युयुत्सुं समुपस्थितम्

सीदन्ति मम गात्राणि मुखं च परिशुष्यति || 28||

Bhagvad Gita 01-29

वेपथुश्च शरीरे मे रोमहर्षश्च जायते |

गाण्डीवं स्रंसते हस्तात्त्वक्चै व परिदह्यते || 29||

Bhagvad Gita 01-30

 न च शक्नोम्यवस्थातुं भ्रमतीव च मे मन: |

निमित्तानि च पश्यामि विपरीतानि केशव || 30||

Bhagvad Gita 01-31

 न च श्रेयोऽनुपश्यामि हत्वा स्वजनमाहवे |

न काङ्क्षे विजयं कृष्ण न च राज्यं सुखानि च || 31||